Rumah Panjai Mengkak

Hallo zaeme! Da bini wider mau... Ha grad eini vo mine letschte Langhuustoure im Jahr 2007 hinger mir; jetz faht ja de dRaegezyt aa u dHouptsaison isch verbi! U wiui wahrschinlech paar Moenet (3-4, schaetzi mau) nueme is Langhuus gah, hani daenkt, i mache itz mau no e iitraag, zum oeich zeige, wies imene Langhuus eigtlech so isch... Es hei mi naemlech scho paar gfragt "heeei, du redsch doch immer vo Langhuus, was isch das ueberhoupt?!" *g*

Ha dFotos i die Reihefoug tah, wie o uesi Tour ablouft.. We mr is Mengkak-Langhuus goeh, de uebernachte mr immer zersch ei Nacht im "Hilton Batang Ai Longhouse Resort" (s'einzige Hotel dert witt und breit) u bsueche naer am 2. Tag sLanghuus! Dert haere fuehrt nume ei Waeg, und zwar uebere See per Langboot! ;-)

es Langboot (Foto isch vom Internet! ha grad kes eigets...)

Waegwiiser fuer dLangboot (mitts ufem See *g*)

We mr de nach ca. 30min im Langhuus aachoeme, verzeu ig (mitem Local Guide) de Chunde zersch mau paar Sache (dass 38 Familie dert laebe, dass dr Chief immer ir Mitti wohnt, dass ke Choepf (vo de Chopfjaeger) meh hange, wiu si sech i daem Langhuus zum Christetum konvertiert hei, etc...) Naer begruesse mr dBewohner (de meischte Aeltere git meh dHand und seit "Nama brita?", was so viu heisst wie "Geits guet?". dAntwort druf isch de "Manah!", das heisst "alles ok!") u mache e chline Rundgang... dr Khalik (dae Local Guide wo am huefigschte mit mir uf Tour isch) hockt de meischtens scho mit de Iban haere und we mr naer zruegg choeme, gits mau oeppis ztrinke!! *g* Entweder Riiswii (Tuak) oder Riisschnaps (Langkau).... Und das am Morge am 10i... Hehe...

e Iban am Tuak iischaenke...

Nachdaem me aagstosse (3x "uuuuuuu-haaaaaaaaa") u chli trunke het, choeme de dTaenzer mit de traditionelle Koschtuem.. (Meischtens 1 Frou und 1 Maa, wes meh Tourischte het deumau o 2 Froue u 2 Manne!) Wenn si ihri Vorfuehrig fertig hei, waerde dChunde drzue ufgforderet o ztanze.... I bi aube froh, bini Guide u nid Tourischt! (Ab und zue chunts aber vor, dass si wei, dassi glich o tanze... Eh ja, de haut! Hehe..)

e junge Iban Taenzer im traditionelle Koschtuem

Waehrend de Taenz und o dernah bir Gschaenksverteilig hockt de fasch s'ganze Langhuus mit ues im Ruai (dr Gang, wo sech sGmeinschaftslaebe vo de Iban abspielt).. Und es het natuerlech huuuere viu haerzigi Chind! Da es paar Fotos...

Je nach Waetter aesse mr de am Seeufer oder im Langhuus... Bi mir ischs huefiger der Fau gsi, dass mr im Langhuus gaesse hei! De steut ues de jewiils dr Chief sini Chuchi zur Verfuegig u dr Local Guide chochet mit de Iban zaeme... (Letscht mau hani sogar o no ghulfe!! I cha jetz Dschungel-Farn choche, guet hm? *g*)

am Chief sis Wohn- bzw. Schlafzimmer (ir Nacht waerde Matrazene usgleit u die ganzi Familie schlaft im gliche Ruum... Mir si scho verwoehnt bi ues, he?? Jedes Ching es eignigs Zimmer... Tztztz... *g*)

dChuchi vom Chief (ufem Fuer gseht dr Bambus, dert drin wird Riis und Poulet kochet... dIban mache das huetzutags eigtlech nume no fuers Erntedankfescht "Gawai" - und fuer dTourischte!)

nomau em Chief sini Chuchi (im Hintergrund Tontoepf us dr Zyt mit de Chinesische Haendler; sehr waertvoll!)

und de sBuffet.... Traditionell wird bi de Iban am Bode gaesse! (O wenn dr Chief ufem obere Foto e Tisch het.. Dae hetter uebrigens neu! *g* Isch vorletscht Mau noni dert gsi...)

Makai, makai.... ("Aesse" uf Iban.. Ghoert me hie sehr oft!! *g*) Dae naebe mir isch uebrigens dr Chief!

Nachem Aesse geits de mau use; dert gits e Hahnekampf und de no e Blasrohrdemonstration.. (Vom Blasrohr hani leider ke Fotos!) Hahnekaempf si fruecher hie sehr oft mit Klinge a de Fuess vo de Haehn gmacht worde, mittlerwile ischs aber streng verbotte! Ohni Klinge darf me aber no...

in Kampfposition....... uuund.....

.....Aaaaatackeeeeee!!! ;-)

Und dernah geits wieder zruegg is Hilton Batang Ai fuer ei Nacht und naer am naechschte Morge zruegg uf Kuching! Sooo.... Ischs e chli klarer das Langhuus?? ;-) Bi wittere Frage betraeffend Rumah Panjai, Langhuus uf Iban (oder o suesch), eifach a mi waende! Hehe....

I wuensche nech e gueti Zyt! Haebet Sorg u vergaesset mi nid ganz... (Macht aube fasch chli dr Iidruck bi deune!) Soeu nid boes gmeint si, aber i hanech no oeppis woeue saege:
Wenn dr mr weit aaluete, de machets eifach... Fraget mi nid, "wenn hesch die Wuche Zyt?", naer gibi aui Date duere, freue mi wienes chlises Chind e Wuche lang jede Abe, nume zum am Aendi feschtschteue, dass doch wider kes Telefon chunt... Grundsaetzlech hani jetz duer dWuche immer ab de 11e (CH-Zyt) bis ca. am 16.00 Zyt u naer s'ganze Wknd! Machets guet u bitte "jangan marah!" (don't be angry!) die wos betrifft... I hanech glich huuere gaern! Adieu.