"Same-same but different" - No. III

Huet vor 7 Moenet bini ir Schwizz abgfloge; jetz bini dopplet so lang witt waegg vo dehei wie dazumals woni z'Indonesie im Ustusch bi gsi... Einersits chunts mr vor, aus wuerdi scho ewig da z'Kuching wohne u andrersits duenkts mi, es sig ersch geschter gsi, woni mi z'Zueri vo mire Familie verabschiedet ha... Weni am Morge ufwache, ischs so saeubschtverschtaendlech, dassi da bi, i ha nie s'Gfueu i sig ir Schwizz oder so (das het me ja suesch aube)... Irgendwie ischs aber raecht schnaeu gange, das Ganze! No 3 Moenet u naer bini scho fertig mitem Praktikum.. Jetz herrscht no gad chli Flaute mit Toure, ab Aendi Februar rock is aber de nomau richtig.. Ei Tour nach der andere, unter anderem fluegi mit ere 14-choepfige Gruppe uf Sabah! Das wird mr ja oeppis...

D'Unterschiede woni nech huet wott verzeue bezieh sech uf Privatsphaere bzw. uf Koerperpfleg (da derzue gits aber ke Fotos! *g*) und 'Chindererziehig':

Hie in Malaysia ischs, im Gaegesatz zur Schwizz, ganz normau oepper z'frage, ob er scho duschet het... Me stellt sech das mau bi ues vor, so unter Freunden, u naer fragt me die angere, ob si scho duschet hei! ;-) Uf jede Fau wird hie 2 mau am Tag duschet, am Morge und am Abe.. Das mache - so viu ig weiss - aui, auso o d'Ching waerde am Abe wider id Duschi gschickt.. Das git aube richtig es Aastah, z.B. bim Nick dehei, we die ganze Nichte und Neffe dert si, und aui der Reihe nache id Duschi gschickt waerde...

Was hie o angers isch - das chani jetz nid generell saege, aber i bi mr fasch sicher, dass das witt verbreitet isch: z.B. aebe bim Dusche haeufe die grosse Gschwueschterte de Chliine, auso die 13-jaehrigi duschet die 2-jaehrigi, de muess d'Muetter das nid mache...

Uebrigens, wenn Gaescht choeme, sis hie o huefig d'Chind wo me schickt, zum z'Trinke hole, Snacks uftische etc... Die sie hie nid so verwoehnt wie bi ues! ;-) Hei o nid aui es eigets Zimmer, sondern schlafe mind. z'zwoeit - im Langhuus sogar mit dr ganze Familie - i eim Zimmer...

E Usnahm bilde aber d'Chinese bi daem woni jetz verzeut ha... Die hei naemlech huefig nume 1 oder 2 Chind und zwar 'dicke Kinder', wo mit McDonalds und KFC verwoehnt waerde... I nimme aa, die berchoeme o deheim aues i Arsch gschobe! ;-)

So, das waers wider mau fuer huet... I wuensche aues Guete und viu Spass im Schnee - faus es het! ;-) I bi letscht Wuchenaend scho wider chli bruun worde... hehehe =) Adieu.

PS: Zum Schluss no 2 Orang Utan-Fotos; die grossi isch d'Seduku, die aeltischti 'Dame' im Semenggoh Wildlife Centre und die angeri isch ihri Tochter, d'Sadam, ca. 5 jaehrig. Het zwar mitem Thema nuet ztue, aber i bi ebe am Samschti wider mau dert gsi... =)